"EÑ BÜYÜK MAQSADIM – ALLAH KÖSTERGEN YOLNEN KETMEK"

"EÑ BÜYÜK MAQSADIM – ALLAH KÖSTERGEN YOLNEN KETMEK"

   Dinara RUMİYEVA
   Qırım musulmanlarınıñ diniy idaresi halqımıznıñ qadimiy adetlerini canlandırmaq, dinimizni milletimizge terence açıqlamaq maqsadınen "Asıl degerlikler" ("İstinnıye tsennosti") adlı leyhanı meydanğa ketirdi. Bu leyha çerçivesinde Qırımnıñ aman-aman bütün şeer, köy ve qasabalarında Qırımda nam qazanğan artist Rustem Memetov, dağıstanlı ilâhiy yırcısı Hadis Sabiyev ve yaş icatkâr Bekir Adilovnıñ icrasında ilâhiy aqşamları ötkerildi. Şu leyha halqımızğa endi yahşı tanılğan yırcı Bekir Adilovnıñ icadını diger taraftan açıqladı.
– Musulman dininiñ esaslarını men sevimli anamnıñ yardımı ile ögrenip başladım. O, men ta mektepte oquğanda camide ötkerilgen kurslarğa barmama sebepçi olğan edi. Soñra men institutqa oqumağa kirdim. Aqmescitte men musulman dinini teren ögrengen insanlarnen tanış oldım. Qırımda nam qazanğan artist Rustem Memetov ve onıñ babası çoqtan berli ilâhiylerniñ söz ve notalarını toplap kelgenler. Rustem ağanı özümniñ birinci ocam, dep sayam. O, meni ögretmeknen bir sırada, men ile özüniñ medeniy baylığınen paylaşa. Dağıstanlı Hadis Sabiyevniñ icadı da meni bu yönelişte icat etmege ilhamlandırdı. İlâhiy – halq ayatınıñ çeşit saalarına başlanğan diniy yırlarıdır. Evel-ezelden toy, dua, cenaze kibi merasimler ilâhiylernen yaraştırıla edi. Menim maqsadım
– bu adetni canlandırıp, öz icadımda Alla köstergen yolnen ketmek. – Bilgenime köre, siz icra etken türkülerniñ sözlerini özüñiz yazasıñız. Bu saada yañılıqlar barmı? – Yaqında men anama bağışlağan bir yır yazdım. Peyğamberimiz (s.a.v) "Cennet analarnıñ ayağı astındadır" degen. Şu sebepten men dünyada eñ yaqın, sevimli, özüni tolusınen balasına, yaqınlarına bağışlağan analarğa ürmet ve sayğı bildirmek maqsadınen böyle türkü yazdım. Yaqında o dünya yüzü körecek. – Yaqın kelecekte nenen oğraşmaq niyetindesiz? – Qırım musulmanlarınıñ diniy idaresi İslâm dinine qoltutuv fondınen birlikte Peyğamberimizniñ (s.a.v) doğum kününe bağışlanğan Mevlüd tedbirlerini ötkere. Şu sebepten, Qarasuvbazar ve Eski Qırım şeerlerinde tedbirler endi keçirildi. Mayıs 5 künü Bağçasaraynıñ "Ayuv-dağ" banket zalında aqşam saat 17-de, Kezlevdeki Bala sanatı mektebinde mayıs 7 künü saat 17-de ve Aqmescitniñ "Yeşil ada" restoranında "İlham" , "Qırım" ansamblleri ve Dilâver Osmanov, Yunus Kakura, Asan Bilâlov kibi belli yırcılarnen beraberlikte bu merasimlerni yaraştırmaq niyetindem. Kiriş serbest, cümleñizni davet etem!
   Al-azırda sanat institutınıñ IV kurs talebesi olğan Bekir Adilov magistraturada oquvını devam etip, halqımız arasında ilâhiylerniñ keniş darqalmasına çalışmaq niyetinde. Biz oña büyük icadiy muvafaqiyetler tileymiz.

Bekir Adilov