DÜNYANI MERHAMET QURTARIR

DÜNYANI MERHAMET QURTARIR

  Timur QURTUMEROV
  Merhametlik – bu kimnidir acımaq, qorçalamaq, afu etmek, bağışlamaq, nimet bermek, sevgi ve şefqat köstermek, eyilik ve ihsan etmek, demektir. Bizim dinimizde muhtac adamğa yardım etmek – bu büyük iştir. Soñki vaqıtta halqımıznıñ bu duyğusı daa ziyade canlandı, demek mümkün.
   Ayrıca bu işte yaşlarımıznı qayd etmek kerek. Olarnıñ yüreklerinde olğan merhametlik duyğuları bizni pek quvandıra. Bazıları bu işnen oğraşqanları aqqında çoq aytıp oturmaylar. Sadece, er bir insannıñ yüreginde merhametlik olması kerek, deyler. Biz olarnen körüşemiz, laf etemiz, amma olarnıñ volontörlıq işleri aqqında bilmeymiz. Olar bunı bir kimsege aytmaylar, amma böyle işlernen çoqtan-çoq qorantalarğa büyük yardım köstereler. İşte, böyle merhametli insanlar "Qırımtatar volontörlar gruppası"nı meydanğa ketirdiler.
  Biz, bu volontörlar taqımınıñ koordinatorı Ayşe Nimetullayevanen subetleştik. O, volontörlarnıñ işleri aqqında, olar öz faaliyetlerini neden başlağanları aqqında pek çoq meraqlı şeyler ayttı.
– Men bu işnen 4 yıl evel oğraşmağa başladım. Belki eşitkendirsiñiz, bizim qorantamızda torunım Elmaz Kumışeva pek hasta edi ve onıñ tedaviylenmesine para toplamaq içün biz volontör işimizni başladıq. O vaqıt biz Elmaz içün 6 biñ dollar topladıq, – dey Ayşe hanım. – Biz diger hasta balalar aqqında da bile edik, o balalarğa da yardım etmek çarelerini qıdırıp başladıq.
Bunı gruppanıñ birinci adımları dep saymaq mümkün. Şu vaqıttan başlap, olar çeşit-türlü hayriye kontsertleri, auktsionlar teşkil etip başladılar. Vaqıt keçe, yardım etmege istegen adamlar maña telefon açıp, ya da internette tapıp öz yardımını teklif etip başladılar. Ebet, bu işnen oğraşmaq içün vaqıt kerek, ve onıñ içün kelgenlerden çoqusı – yaşlar, mektep talebeleri, studentlerdir.
   "Bilesiñizmi, Qırımnıñ çeşit köşelerinde pek çoq volontörlar bar. Biz biri-birimizni bilemiz ve, ebet, beraberlikte hasta balalarğa, ya da muhtac adamlarğa yardım etmege tırışamız, – dey Ayşe hanım. – Meselâ, Aqmeçit rayonında eki qart yaşay. Bu eki qartnıñ alı pek acınıqlı. Qartlarnıñ alğan pensiyaları ruhiy hasta oğullarınıñ ilâclarına bile yetmey. Yaşlarımız olarğa pek çoq yardım eteler. Aştan başlap, qışta kömür, odun alıp bardılar. Qartbaba hasta, turıp olamay. Oña qaydandır yaşlarımız televizor taptılar. Qartbabanıñ quvançını körip daa ziyade olarğa yardım etmege tırışalar. Bu – yaşlarımız yapqan işlerniñ yüzden biridir".
   Ayşe hanımnıñ aytqanına köre, olar malümatnı esasen internetten alalar. Şimdi endi çoq adamlar volontörlar aqqında bilip özleri olarğa yazalar. – Bizge er kün çoqtan-çoq mektüpler kele. Yazıqlar olsun, amma biz şimdi er keske yardım etip olamaymız. Ebet, adamlar bizge yardım eteler – para, aş, suv, urbalar ketirip bereler, – dey Ayşe hanım. – Sponsorlarnı tapmaq içün çoq çapqalamaq kerek. Amma, qayd etmek kerek ki, hasta bala, ya da muhtac qoranta aqqında aytıp başlasañ, kimse yoq demey.
   Volontörlarnıñ ğayeleri çoq. Olar çeşit-türlü merasimlerni keçirmege isteyler, amma şeerde keçirmek içün izin kerek, onı almaq içün çoq problemler de çıqa, amma Ayşe hanım ve onıñ taqımı çareler tapıp, planlaştırılğan merasimlerni keçire. Biz de öz tarafımızdan bu alicenap yaşlarğa işlerinde muvafaqiyetler tileymiz. Yüreklerinde olğan merhametlik alevi iç bir vaqıt sönmesin!
   Yanı Dünya Gazetası