HALQ MEDENIYETINDE QADIN

HALQ MEDENIYETINDE QADIN

Ranetta ĞAFAROVA
   Şu mevzuda mart 13-15 künleri Türkiyeniñ Şanlıurfa şeerindeki Harran universitetinde ötkerilgen halqara konferentsiyada bu satırlar müellifi de iştirak etip, "Qırımtatar qadınlarınıñ içtimaiy ve siyasiy ömürde rolü" serlevalı maruzanen çıqışta bulundı.

   Üç kün devamında qadınnıñ halq medeniyetinde, tasilinde, muzıkasında, sanatında, edebiyatında, sağlığında, iqtisadiyatında rolü, ailede, cemiyette yeri hususında muzakereler etilgen konferentsiya delegatlarını Haliliye belediye başı Fevzi Demirqol "Halq medeniyetinde qadın degenimizde zaman qadınınıñ Ava anamızdan başlap bugünge qadar çeşit cemiyetler, çeşit coğrafiyalar, çeşit şartlarğa köre çeşit tabiat ve alışqınlıqları bar. Qadın bizim añlayışımızğa köre azreti Avadır. Qadın Safa ve Merve arasında balasına suv tapmaq içün ğayret ile çapqalağan azreti Acerdir. Qadın İslâmda ilk oca azreti Ayşedir. Kendisi aqqında eñ çoq rivayet etilgen ve yalıñız qadınlarğa degil de, erkeklerge de ocalıq yapqan ve aynı zamanda baş komandanlıq da yap¬qan azreti Ayşedir. Çeşit zamanlarda türk toplumı ve İslâm toplumında qadınnıñ ayrıca yeri bar. Erkekler ne yapsalar, qadınlar da aynı işni yaptılar ve bundan soñra da yapacaqlar. 328 nefer alim iştirakinde üç kün qadınlarnıñ hızmeti aqqında muşavere olacaq, amma kene eksik qalacaq".

   Gazetamız mühbiri öz çıqışında Qırımda ta hanlar devrinden başlap, 20-nci asırnıñ başında ve künümizge qadar qırımtatar qadınlarınıñ areketi, tarihımızda qaldırğan izi, faaliyetlerini tarif etti.

   Türk dünyasında ilk gazetanıñ tesisçisi olğan İsmail Gasprinskiyniñ qadınlarğa nisbeten sayğısı, "Terciman"da qadın mevzusına berilgen emiyet ve niayet qızı Şefiqa Gasprinskaya muarrirliginde "Alem-i Nisvan" mecmuasınıñ çıqması aqqında aytılıp, Qırımda bugün Şefiqa hanım işi devamcılarınıñ areketi qayd etildi.

Yanı Dünya Gazetesi