Ukraina prezidentiniñ qırımtatar işlerinden vekâletlisi Mustafa Abdulcemil Kırımoğlu Moskva merkezinde cuma künü öldürilgen Rusiye muhalifi Boris Nemtsovnıñ tuvğanlarına taziyelerini bildirdi.
«Moskvada muhalif Boris Nemtsov öldürildi. Onıñ tuvğanlarına ve safdaşlarına taziye bildiremiz. 21-nci asırda Sovet birliginiñ eñ yaramay şaraitlerinde, «istenmezlerniñ» yoq etilmesi normal bir şey olğan memlekette yaşağan Rusiye halqına taziye bildiremiz», – dep bildire Cemilevniñ sözlerini matbuat hızmeti.
Prezident vekâletlisiniñ beyanatında aytılğanı kibi, Boris Nemtsov soñ aftaları Rusiyede cenkke qarşı mitingni azırlay edi, bunı o Kiyevde fevral 26 künü keçirilgen konferentsiya arfesinde bildirdi.
«Moskvada mart 1 künü keçirilecek buhran ve cenkke qarşı mitingniñ teşkil etilmesi ile meşğulim. Şunıñ içün, teessüf ki, kelip olamacam. Mustafa Cemilevge ve yahşı insanlarğa selâm yollayım»,– dep bildire Nemtsovnıñ sözlerini Mustafa Cemilevniñ matbuat hızmeti.
Boris Nemtsovnı Moskvanıñ merkezinde fevral 27-de aqşam öldürdiler. Şaatlarnıñ aytqanına köre, eñ azından dört kere ateş açıldı. Nemtsov vaqia yerinde can berdi. Öldürüv boyunca cinaiy iş açıldı. Ukraina, AQŞ ve AB yetekçileri yüz bergen adiseden şaşıp, qabaatlı insanlar cezasını körecegine ümüt besleyler.
Rusiye prezidenti Vladimir Putin muhalifniñ öldürüvini takbih etip, vaqianı tarik olaraq adladı.
Mart 1 künü Moskvada Boris Nemtsov hatırasına yürüş keçecek. Muhalifet tarafdarları numayışnı «Baar» yürüşi yerinde keçirecekler.
Boris Nemtsov ile salı künü, mart 3-de, Moskvada Saharov merkezinde vedalaşacaqlar.
0 yorum:
Yorum Gönder
Lütfen konuyla alakalı yorumlar yapın. Kırımın Sesi