KTMM MİLLİ MEKTEP MEZUNLARINI HAYIRLAY

 Bugün, mayıs 22 künü, Vatanımız Qırımnıñ er bir köşelerinde mektep talebeleri içün soñki zil çıñladı. Milliy Meclis adından talebelerimizni ve mezunlarımıznı bu güzel bayramnen hayırlaymız ve açıq göñülden olarğa sağlıq-selâmetlik, bütün işlerinde muvafaqiyetler tileymiz.

 Mektep – büyük ömürge bir adımdır. Bu adımnı atqan, bilgi alğan yaş nesilimizge büyük ümütlerimiz bar. Bilgi almaq er insannıñ borcudır. Aqıllı ve ikmetli gençlerimiz - halqımıznıñ kelecegidir. 

Eminmiz, olar Qırımda vatanperver insanlar olıp yaşaycaqlar ve bu dülber diyarnı güzelleştirecekler. Kelecekleri aydın, parlaq olsun!

 Ayrı teşekkürlerimizni ocalarımızğa bildiremiz. Ocalıq zenaatı – yaşayışta eñ alicenap zenaatlardan biridir. Dünyada oca - eñ müim, kelecek nesilniñ terbiyelemesinde büyük emiyet köstergen insandır. Ocanıñ borcu tek öz fenine ögretmek degil de, ahlâqiy terbiyevinde ana-babalarğa yardım etmekni közde tuta. Olar balalarğa ömür merdivenniñ ilk basamaqlarına birinci adım atmağa yardım eteler, ocalıq faaliyetine bütün ömrüni bağışlap, balalarğa büyük alemni açalar, er bir talebege yaşayışta özüniñ yerini tapmağa yardım eteler. Terbiyecilerine o qadar sevgi, eyilik bereler ki, elbette, bular episi ürmetke lâyıq. Biz ocalarımızğa sağlıq ve sabır, bütün işlerinde muvafaqiyet tileymiz.

 Ocalar yanında ise birinci yardım qolunı uzatqan insanlar – bu, şübesiz, talebelerniñ ana-babalarıdır. Eger balalarımız ocalarnıñ işançı olsa, ana-babalar ise er bir ocağa tayançıdır. Oquv-terbiyelev ceryanında er vaqıt ocanıñ yanında olıp, mektep işlerine öz issesini qoşalar. Yürekten bütün ana-babalarımızğa minnetdarlığımıznı bildiremiz. Cümlesine sabır ve ilham tileymiz.

 Bütün mezunlarımızğa ise mustaqil ve mürekkep ayat bosağasında arzı-istekleri yerine kelecek yollarnı seçmege tileymiz! Kiriş imtianlarda da muvafaqiyetler, öz küç ve bilgilerine inanmaqnı tileymiz! Yoluñız daima açıq, qısmetiñiz bol olsun! Allah ep yardımcıñız olsun!