Mesele ana tilinde yazmaq, ya da yazmamaq degil ki…

MUHAMED ALİ SULAYMANOV

Mesele ana tilinde yazmaq, ya da yazmamaq degil ki. Asıl mesele halqımız içün ayatiy zaruret taşığan ve ölüm-qalım meselesi olğan, milliy tüşünce ve yüksek mefkürelerni, içtimaiy ve ruhiy, iqtisadiy ve siyasiy meselelerni ana tilinde yazmaq, oqumaq ve muzakere etmektir. Halqımıznıñ bu kün yaşağanı sıqıntılarnı ve çözme yollarını qıdırmaq, tapmaq ve cemaatqa teklif etmek. Elbette ki, bu saada yazılğan maqaleler ve kitaplar yarın publitsistikamıznıñ ve edebiyatımıznıñ müim bir parçası olacaq, amma şu anda bu edebiyattan da, tilşinaslıqtan da müim bir mesele! Bu "bir qurşunnen eki degil bir qaç quşnı urmaq" kibidir, bizim bar olma mucadelemiz ve milliy tirilişimizniñ temelidir. Ve elbette ki, onıñ milliy olması içün ana tilinde olması kerek.
Menimce, nasıl ki, ticaret oqulda ögrenilmez kerçek iş saasında ögrenilir, öyle de artıq ana tilimizni elif-be kekelemelerinde degil, içtimaiy-iqtisadiy ayatnıñ içinde yaşayıp, idraq etmemiz şarttır! Ana til esasında ögrenilmez, yaşanır, asıl mesele de bu olsa kerek.
Ve bizim bütün matbuat, radio ve televideniyemiz de bu işte daa aktiv yer alması mecburdır!
Nasıl mı?
Bu da ticaret, iqtisadiyat, muvaffaqiyet, yatırım (investitsiya), kreativ (yaratıcılıq) yaqlaşımı, içtimaiy, ruhiy ve ahlakiy meseleler ve çezme yolları kibi mevzularda ihtisas (professional) programmalar yapıp, böylece, ana tilimizni ayatımıznıñ taa ortasına soqmaqnen, yaşatmaqnen olur! Qolay degil, amma başqa yolu da bilmeyim, bilgenler bar ise buyursun, añlatsınlar!