Domuz eti şaşlığı ve ya "zemaneviy qırımtatar aşları"

Domuz eti şaşlığı ve ya "zemaneviy qırımtatar aşları"

Soñ künlerde "Domuz gripi" mevzusı, bir qorqunçlı qara bulıt kibi, haberlerden tüşmemektedir. Bilmem kerçekten böyle belâ tura mı başımızda, yoqsa kene diqqatlarnı başqa tarafqa çekmege istegenler mi bar...? Er ne olsa da, Allah qorçalasın epimizgi!
Aslında, añlatmaq isegenim de bu degildi. Bu kün aqşam evge kelsem; menim balalar da "domuz gripi" üzerinde muzakerelerge dalğanlar. Qızım ne fikir beyan etkenini eşitmedim, amma qapudan yeni kirgen edim ki, sekiz yaşındaki oğlumnıñ soñ derece "ilmiy" sözleri meni pek memnün etti: "...yoyoyoyoq, tata! "Domuz gripi" ne vaqıt ola, bilesiñ mi? Qırımtatarlar domuz eti aşasa, soñ ola!" Kendimni zordan tuttım, bir sual sormamaq içün: Ya, bu "Qırımtatar yemekleri" adından domuz eti şaşlığı yahut domuz qaburga kebabı satqan bizim halqtan bazı insanlarnıñ kafelerine de bir şey olmay mı? Ya da saiplerniñ vicdanlarına…? Aman, bir şey olsın dep istegenimni añlamañız bu sözlerimden. Olar içün yamanlıq istemem, insaf isterim, insaf…
Bir kün yazda deñiz yalısında ketkende "başqa çöküç" kibi bir reklam tabelâsını körüdüm. Balaban bir reklama üstünde rusça "Krımskotatarskaya kuhnâ" yazılğan, astında da yemekler. Ve nasıl yemekten başlanğan bu menü, bilesiñiz mi? Şaşlık iz svininı…
Ne zamandır, bir cetvel yapıp internetke qoymğa tüşünem: "Domuz eti aşamağa istegen qırımtatarları bu kafelerge barsın" dep... Soñ kimseniñ canı da ağırmasın, işte olarğa "bedava reklama"!
Men evvelden bir qırımtatar kafesine kirgende qorqmaip, raat olıp, er yemekten aşay edim. Amma endi menünı baştan sonuna qadar baqıp çıqam, ve anda domuz etinden yemekler olsa turıp ketem! Uç quruş para içün dinini, urf-adetini, qısmetini, qazan-çömlekni ve adını kirletmekten saqınmağan insan, domuz etine ayrı bıçaq, elâl etke ayrı bıçağı mı tüşünecek? Aydi ya… Domuz şaşlığı kimler içün yapılğan ise, olar "şenlendirsin" böyle kafelerni!
Ürmetke layıq olğanlarğa eñ teren ürmetnen…