Qırım Müftisü hacı Emirali Ablayev dindaşlarnı Mevlid gecesinen hayırlay

Müfti hacı Emirali Ablayev Qırım ve Sevastopol musulmanları diniy idaresi adından Muhammed Peyğamberimizniñ (s.a.v) doğğan kününi temsil etken muqaddes Mevlid gecesinen dindaşlarnı hayırlay. Qırım musulmanlarınıñ maneviy yetekçisi Qırım ve bütün dünyada amanlıq üküm sürmesini, er qorantağa sağlıq-selâmetlik, em de Mevlid gecesini Allahqa dua ve yalvaruv içinde keçirilmesini tiley. "Bu geceni dualarnen yaraştırmaq, Allahnı añıp, zikr etmek, Muhammed Peyğamberimizge (s.a.v) salâvatlar ketirip, mağfiret tilemek adettendir.
Keliñiz, muhtaclarnı hatırlap, sadaqalarımıznı bereyik. Allah Taalâ hayırlı işleriñizni qat-qat arttırsıñ, sevaplarğa yazdırsın, Mahşer künü Muhammed Peyğamberimizniñ (s.a.v) şefaatına nail etsin", - dep hayırladı Müfti efendi. İslâm dini Peyğamberiniñ doğğan künü Hicriy 1437 senesiniñ Rabiu’l-evvel ayınıñ 12-ne rast kele. Adet üzre musulmanlar soñki Peyğamberniñ doğğan kününi kün evelden aqşam namazından soñ qayd etip başlaylar. Bu gece – Mevlid gecesi olaraq adlandırıla.

QMDİ MDT matbuat hızmeti