Qırım(Kırımınsesi)
Bu künlerde milliy tasil fedaiysi Aliye Veliula 80 yaşını toldurdı. Bu münasebetle Qırım mühendislik-pedagogika üniversitetinde Aliye ocanıñ yübileyi qayd etildi. Onı meslekdeşleri ve talebeleri can-yürekten tebriklediler ve bahşışlar ile güldesteler taqdim eterek, sağlıq-sıhhat ve amanlıqlar tilediler. Aliye oca 1935 senesi dünyağa kele.
Sürgünlikte başta mektepni, sonra Taşkentte Nizami adına pedagogika institutında aliy tasil ala. İnstitıtnı bitirgen soñ mektepte rus tilinden ders bere. Soñundan Taşkentte qırımtatar tilinden ders bergen ilk ocalardan biri ola. Başta mektepte, sonra Devlet pedagogika institutında yigirmi yıl ocalıq yapa.
1992 senesi ise Ana-Vatanğa avdet ola. Mında başta KRİPPOda (diplomdan sonki tasil institutında), soñra Qırım sanayı-pedagogika institutında ocalıq faaliyetini devam ete. Qırımda ana tilinde tasil sistemasını ğayrıdan tiklemege ğayret etken fedakar ocalardan biri ola.
O, mektepler içün çıqarılğan bir sıra kitap ve qullanmalarnın müellifidir: ‘Tuvğan edebiyat. 5-inci sınıf’, ‘Tuvğan edebiyat. 6-ıncı sınıf’ ‘Qırımtatar ve çetel edebiyatı. 5-7-inci sınıflar içün’, ‘Qırımtatar ve cian edebiyatı. 11-inci sınıf’, ‘Qırımtatar tili grammatikasından cedveller’ ve ilahre. Bundan ğayrı, Aliye oca ‘Maarifçi’ birliginiñ azası olaraq, ‘Tasil’ ocalar mecmuasınıñ ilk muharriri ola
. O, icatkar insan olaraq, şiirler de yaza. 2011 senesi onın büyük alim ve şair Bekir Çobanzadege bağışlanğan ‘Şanlı hayat’ destanı Qırım oquv-pedagogika neşriyatında dünya yüzü kördi. Sayğılı Aliye ocağa qaviy sağlıq, tendüristlik ve uzun ömür tileymiz. Hayırlı yaşlar olsun!
0 yorum:
Yorum Gönder
Lütfen konuyla alakalı yorumlar yapın. Kırımın Sesi