Qırımtatar Milliy Meclis sayfasından yapılan açıklama Ürmetli Ahtem ağamız 51 yaşını toldurdı.
Bugün, dekabrniñ 14-nde, halqımıznıñ liderlerinden birisi, Qırımtatar Milliy Meclis reisiniñ muavini Ahtem Çiygozniñ doğulğan künü.
Ürmetli ağamız 51 yaşını toldurdı. Maalesef, bilgeniñiz kibi, 2015 senesi yanvarniñ 29-da Ahtem ağanı "fevral 26" işi boyunca yaqaladılar ve onıñ apiste bulunğanından endi aman-aman bir yıl olacaqtır… Adaletsizlik, zulüm ve aqsızlıq yer yüzüniñ er bir köşesini sarıp aldı…
Qanunsız sürette qabaatlanğan Ahtem Çiygoz tuvğanları, arqadaşları, halqından belki nice senelerge ayırılmaq istiqbaline baqmadan, bugünki künde bizge namus ve cesaret nümünesini köstere! Bilemiz, bu cinaiy işlerini alıp barğanlar, Ahtem ağanıñ iradesini yıqmağa degil de, onı quvetlendirmege yaraycaqtırlar!
Ümütlerimizni asla kesmeyik, ruhtan tüşmeyik! Eminmiz, adalet ille yeñecek! Şübesiz, neticede kerçek cinayetçiler mahkemelerniñ eñ adaletli olğan – Yüce Allahnıñ mahkemesinden qaçıp olamazlar, ya bu ya da o bir dünyada cezalarını tolusınen alırlar, inşaAllah. Halqımıznıñ qaramanı, mühterem Ahtem ağamızğa bu künde, elbette, onıñ eñ yaqın zamanda azat etilmesini tilemege isteymiz! Qırım – bizim aziz Vatanımızğa olğan sevgiñiz sizge küç ve sabır bersin, sağlığıñız qaviy, yüregiñiz raat olsun, Ahtem ağa! Eminmiz, Rabbimizniñ yardımı ile bu imtianlardan da keçerik ve ğalebe bizim olacaqtır, inşaAllah!
Qırımtatar Milliy Meclisiniñ azaları
Qırımtatar Milliy Meclisi
0 yorum:
Yorum Gönder
Lütfen konuyla alakalı yorumlar yapın. Kırımın Sesi