HACI EMİRALİ ABLAYEV: DİNİMİZ BARIŞ VE MERHAMETLİK DİNİ

Qırım musulmanlarınıñ lideri hacı Emirali Ablayev musulman din hızmetçilerini Qırımda yüz bergen fevqulade vaziyetten sebep yardım köstermege, millet ve dinlerine baqmadan diqqat ayırmağa çağırdı. Bunı Qırım Müftisi dekabrniñ 1-nde rayon imamları ve din cemaatları reisleriniñ er ay Müftiyatnıñ baş ofisinde ötkerilgen toplaşuvında ayttı.
Tedbirde Qırımnıñ er bir rayonından din hızmetçileri iştirak ettiler, olar yaşağan yerlerde musulman cemaatlarınıñ vaziyeti, ışıqsız yaşayışları, alınğan tedbirler aqqında ikâye ettiler. Rayonlarnıñ baş imamları bildirgenleri kibi, yerli musulmanlar elektrik qamaçavı sebebinden qasevetliler, çünki bu al bir çoq qolaysızlıqlar ve masraflarnen belgilendi, amma, kelecekke ümütnen baqıp, vaziyet deñişecegine işanalar.
Qırım Müftisi, İslâm- barışıq ve merhametlik dini olğanını hatırlatıp, musulman din hızmetçileri yardımğa muhtac olğanlarğa yardım köstermek kerekler, dep ayttı. -Bizim esas vazifemiz – tınçlıq ve eyi qomşulıqqa çağırtmaq, er söz ve cümlemizde Qırım ve sakinleriniñ eyiligini qayğırmalımız, - dep qayd etti Müfti.
Hatırlatamız, rayonlarnıñ baş imamları ve din cemiyetleri reisleriniñ toplaşuvı din hızmetçileriniñ ealinen işini qolaylaştırmaq, musulmanlarnıñ bilgilerini arttırmaq maqsadında er aynıñ başında ötkerile.