«QIRIM» ANSAMBLİ 25 YAŞINI TOLDURDI

Kırımınsesi(Kırım)
Qırımtatar halqınıñ «Qırım» folklor ansambli 25 yaşını toldurdı. Bu münasebetnen oktabr (ekim) 29 künü Aqmescit şeerinde İsmail Gasprinskiy adına  cumhuriyet kütüphanesinde yubiley tedbiri ötkerildi.

Şu künü kütüphane müdüri Gülnar Yağyayeva ve hadimler, Qırımtatar Yazıcıları Birliginin reisi Riza Fazıl, «Maarif» birliginin reisi Safure Kadjametova, bu birlikniñ azası olğan namlı oca Seyran Useinov hem de milliy sanat muhlisleri «Qırım» ansambliniñ kollektivini ve onıñ bediiy rehberi, Ukrainada ve Tataristan Cumhuriyetinde nam qazanğan sanat erbabı Server Kakuranı can-gönülden tebriklediler. Olar «Qırım» ansambliniñ yapqan işlerine yüksek qıymet kesip ve oña icadiy muvafaqiyetler tilep,  Server Kakurağa güldesteler ve kitaplar taqdim ettiler.

Halqımıznıñ folklor ananelerini saqlap qalmaq, milliy muzıka sanatımıznı dünyağa tanıtmaq içün 25 yıldan berli sadıqane hızmet etip kelgen «Qırım» ansamlini biz de hayırlaymız. Yaşasın «Qırım»!