Kırımoğlu: ATR'nin esas «qabaatı» yalan aytmadı ve akimiyetni maqtamadı

Kırımoğlu: ATRniñ esas «qabaatı» yalan aytmadı ve akimiyetni maqtamadı

   Kırımtatarlarnıñ milliy lideri, Ukraina prezidentiniñ qırımtatar halqı işlerinden vekâletlisi Mustafa Cemilevniñ fikirince, ATR telekanalı akimiyetni maqtamağan soñ Roskomnadzornıñ litsenziyasını alıp olamadı.
   Bunı o,1 Nisanda Kiyevde Avropa ekspertleri ve siyasetçileri ile körüşüvinde birinci qırımtatar telekanalnı muzakere etkende ayttı.
Cemilevniñ matbuat hızmeti bildire ki, milliy lider telekanal vaziyetni kerginleştirmey, vazifesini yapa ve vaqialarnı aydınlata edi, dep qayd etti.
   «Onıñ esas qabaatı şunda ki, o, yalan aytmayıp, kerçeklerni bildirdi ve akimiyetni maqtamadı», – dedi
   Körüşüvde bulunğan Qırımtatar Milliy Meclisiniñ reisi Refat Çubarov bir mediaholdingniñ terkibine kirgen ATR ve «Lâle» telekanalları, em de «Meydan» radiosınıñ umumavropalı medeniy matbuat leyhası olaraq inkişafına ciddiy yanaşmağa çağırdı.
   1 Nisan dan itibaren ATR işini toqtattı. Mart ayınıñ soñuna qadar telekanal Rusiye qanunlarına köre öyle de qayd olamadı.
   Telekompaniya Roskomnadzorğa vesiqalarnı bir qaç kere bergen edi, lâkin olarnı farqlı sebeplerden keri qaytarğan ediler. ATR mediaholdingine kirgen Lâle qırımtatar bala telekanalı, «Meydan» ve «Lider» radioları da aynı vaziyetke oğradılar. «15 minut» internet neşiri ve QHA da Rusiyede qayd etip olamadılar.

Qırım.Akikat