Sizden en hayırlısı Quran oqumağa ögrengen ve digerlerni ögretkendir

Qurannı idraq etmek içün onı yahşı oqumağa ögrenmek lâzimdir.

   Er musulman kişi Quran oqumağa ögrenmek kerektir. Eñ evelâ, Qurannı idraq etmek içün onı yahşı oqumağa ögrenmek lâzimdir. Böyle maqsat ile Qırım musulmanları diniy idaresi yarımadanıñ bir çoq camilerinde qadın-qızlar ve erkekler içün Quran oquvı kurslarını teşkil ete. Qırım Müftiyatınıñ baş ofisinde (Aqmescit ş., Kurçatov s., 4) Quran oquvı kursı cuma künü saat 14.30 dan 17.00 ge qadar, cumaertesi künü saat10.00 dan 15.00 ke qadar keçirile. Bu yerde dersler Qalay yüksek islâm ilimleri medresesiniñ mezunları Gülsum Şirinskaya ve Ayşe Duran tarafından berile. Qayd etmek kerek ki, Quran oqumağa istegenlerniñ sayısı ep arta. Müftiyat yaşına baqmadan er musulmannı bu kurslarğa qatnamağa çağıra. Quran-ı Kerim Allahtan insanlarğa doğru yol kösterici olaraq endirildi. Muhammed Peyğamberimiz (s.a.v.) böyle buyurdı: "Sizden eñ hayırlısı Quran oqumağa ögrengen ve digerlerni ögretkendir" (Buhari, Fadailul-Quran, 21; Abu Daud, Vitr, 14/1452; Tirmizi, Fadailul-Quran, 15/2907). Bu hadiste añlatıla ki, ihlâsnen, Allahnıñ rizasını qazanmaq içün Muqaddes Kitabımıznı oqumağa ögrengen ve yaqınlarını ögretkenler eñ yahşı insanlardır. Çünki Quran-ı Kerim Allahnıñ sözüdir. 

QMDİ matbuat hızmeti