Qırım levhaları

Qırım levhaları

   Türkiyedeki candan sevgili soydaşlarıma Qırımın kerçek hayatını tanıtmaq niyetile elime qalem aldım. Ama, bunu nasıl bir sürette tarif etmek ki, nasıl mevzularnı açıqlamaq, hal-hazırki durumlarımıznı qaramı, müsbetmi tüsünde köstermek felân şüphelerge esir olundım. Anca bilem ki, oquyıcım yazılarda “Qırım” sözçügine rastkeldikçe ister istemez telâşlanır, qara degil, çoqsu hayırlı haberlerge meyil olur. Böyleliknen, öz Qırım üzerinde yaptığım seyretmelerini biraz açıq renklerde köstermege söz berem.

Rusiye Qırımnı ilhaq etken kününden itibaren azmı-çoqmı bir buçuq yıl oldu. Bu zaman zarfında Qırım halqı çeşitli vaqialarğa şaat oldu, dayandı. İşte, milletim içün bu “maceralı” olaylarınıñ bir mantıqıy neticesini tüşünip-taşınıp çıqqan künüm bile qalmadı. Ve hatta sağlığıma bile zarar körmege başladım. Yavaş-yavaş özümni elime almağa tırışırken, dünyağa filosof közünen baqmağa başladım. Ve ömrümde olup keçken bütün vaqialarını Allağı sınavı kibi qabul ettim. Biz tüşken şaraitlerimizni güzel, añlayışlı anlatmaq içün mubalâğa ve teneştirmelerge muracaat etecegim. İşte, İslâm dini, imanından her kün azar-azar uzaqlaşqan tanışlarınıznı ve gece-kündüz Allağa ibadetlerde bulunğan soylarınıznı köz ögüne ketirin. Fikir ve hareketlerile samimiy olaraq Allağın buyuruqlarına uymağa tırışqan hemşirelerimiz, biraderlerimiz bizim arasında kendilerini nasıl hiseteler anca? Sorañız baqayım, biz künde 5 defa namaz qılmaqnı unutqan cinabetler arasında bulunıp, ne qadar can ıstıraplarnı başından keçirmege, ne qadar azap zeherini yüreklerine içirtmege mecbur olalar? Cevabı bellidir...

Aynı suali-cevabı bizden de: Bu nasıl ola da yıllarca aynı devlette, bir topraqta yaşadığımız zaman aralarımızda közleri açıq, ama haqiqatnı körmegen adamlar yüre. Bugün siz bilgen Qırım – Qırım degil. Trenler, uçaqlar qatnamay, maaşlar qat qat eksilmekte, suv kanallarında suv qalmadı, sivil adam qalmadı – asker urbasını kiyip yürgen haydutlar taşıp toldu. Aqmrscit şehrini urbaları çürük, birisiniñ ayaqlarında, birisiniñ ellerinde barmaqları kesik, üst-başları kir-kifoz fosiller toldurdı. Ne yerge baqmasañ qanunsuzlıq. Evvel Muhtar ve şindi sade cumhuriyet derecesine engen Ana-Yurtumızın başında turğanlarnıñ ağzına şeytan tükürgeni kibi, ehaliniñ közüne baqıp aytqan yalandan utanmaq bilmeyler. Adamlarnıñ bir bacaq bala kibi zaneterken yol boyu hayvan tersligine tüşüp pislengen ellerini de işte bu balanıñ başına siler eken, zavallı çocuq ise bunu qına zannetip quvana.

Söz kelimi, Qırımnıñ bu kibi kerçeklilerine dayanıp olamağan qırımtatar milleti rusların arasında hayatını keçirirken, kendilerini sapqınlar arasın tüşken mümin kibi duyar.