Kırım camilerinde Cengiz Dağcı dua ile anıldı.

   Qırım camilerinde qırımtatar yazıcı Cengiz Dağcınıñ hatırasına bağışlanğan dua merasimleri teşkil etildi.

   Şu cümleden, dua Aqmescitteki Kebir Camide de keçirildi. Bu yerde 150 den ziyade insan toplaştı. Kebir Cami imamı Niyaziy Ramazanov "Yasin" suresini oqudı ve merhum Cengiz Dağcı Allahnıñ rahmetinde olmasını tiledi. Dua merasiminde em qırımtatar milliy areket veteranları, em de gençler iştirak ettiler. 
   Cengiz Dağcı em qırımtatar halqı, em de türk dünyası ve edebiyatı içün büyük bir miras qaldırdı. Ömrüniñ büyük bir qısımını ğurbette keçirdi. Onıñ romanları ve eserlerinde vetanğa asret, halqına sevgi duyğuları duyula. Cengiz Dağcı bizden ne qadar uzaq olsa da, o daima bizim yüreklerimizde qalmaqta, onıñ içün dua etemiz, Allahnıñ rahmetinde olsun, dep, ayttı Aqmescit rayonınıñ imamı Raim Ğafarov. Cengiz Dağcı 2011 senesi, sentâbr 22 de London şeerinde vefat etti. Vefat etmezden evel, yazıcı onı Qırımda musulman adetlerine köre kömmege vasiyet etti. 
   2011 senesi, oktâbr 2 de Aqmescitteki Kebir Camide Cengiz Dağcınıñ cenaze namazı qılındı, bundan soñ yazıcınıñ cesedi Yaltadaki Qızıltaş köyüniñ mezarlığında kömüldi.

   
   Cengiz Dağcı 1920 senesi, mart 9 da Gurzufta doğdı. Aqmescit orta mektebini bitirip, Qırım pedagogika institutınıñ tarih fakultetine kirdi. 1940 senesiniñ soñunda orduğa çağırıldı. Bundan soñ cenk, esirlik, toplama lagerleri, ğurbetlikte yaşayışnı (1946 senesinden başlap, ayatınıñ soñuna qadar) başından keçirdi. Cengiz Dağcınıñ ilk şiirleri, ikâyeleri, öçerkleri, reportajları cenkten evel Qırım gazeta ve mecmualarında bastırılğan edi. Ğurbetlikte olıp ise, o nesirci, çeşit janrlarğa ait olğan epik eserlerini, şu cümleden roman, povest, hatıra defterleriniñ müellifi oldı. Yazıcı esasen cenkten evelki Qırım, cenk, esirlik ve ğurbetlikte yaşayış mevzularını aydınlatqan edi. Cengiz Dağcı 26 nesir eserini yazdı. Olarnıñ çoqusı roman janrında yazıldı. 

   Cengiz Dağcı ilk "Qorqunç yıllar" romanını cenk vaqtında qırım tatar tilinde yazmağa başladı. Amma soñra bu emerni türk tiline tercime etti. Bundan soñ, onıñ eserlerini kimse qırımtatar tilinde bastırmaycağını bilip, romanlarını türk tilinde yazmağa başladı. Çünki o vaqıt qırımtatar oquyıcılarına onıñ yolu qapalı edi. 1985 senesi, mart ayından başlap, 1992 senesi, dekabr ayına qadar "Yansılar" hatıra defterini yazdı. O defterde aman-aman bir asırlıq vaqialar aqqında tarif etile. Bu eserde yazıcınıñ tercimeialı, tarihiy şahıslar, medeniyet, siyasiy vaqialar aqqında oqumaq mümkün. 

   Cengiz Dağcınıñ icadı tek qırımtatar degil de, umumiy türk edebiyatınıñ degerli bir parçası ola. Yazıcınıñ icadında yigirminci asır Qırımnıñ ayatı aks etile. (kitâbiyat malümatı filologiya ilimleri doktorı, professor Adile Emirovanıñ malümatına binaen teşkil etildi). 

QMDİ matbuat hızmeti