Müftiyat ana tilimizniñ inkişafına öz issesini qoşa Belli olğanı kibi, fevral 21 künü bütün dünya Halqara ana tili kününi qayd etti. Ana tili ğayıp olmaq havfı astında bulunğan qırımtatar halqı içün de bu kün seneden-sene ayrı mananı taşımaqta. Bu saada alimler, tilşınaslar, tedqiqatçılar çalışa, Qırımnıñ eki aliy oquv yurtınıñ qırımtatar tili ve edebiyatı kafedraları açıldı. Yarımadanıñ esas musulman ealisi olğan qırımtatar halqınıñ ana tilini saqlamaq içün Qırım musulmanları diniy idaresi de öz issesini daima qoşmaqta. Böyle maqsat ile, endi 20 yıldan ziyade QMDİ tarafından bastırılğan "Hidayet" gazetası qırımtatar tilinde neşir etilip, bütün yarımada boyunca 5000 nusha miqdarında tarqatıla. Bundan da ğayrı, Müftiyat ve şahsen Qırım müftisi hacı Emirali Ablayevniñ qararı ile, yarımada camilerinde hutbe ve subetler qırımtatar tilinde keçirile. Bu ise, camige kelgen musulmanlarğa, hususan gençlerge, tilni ögrenmege yardım ete. Qırım musulmanları diniy idaresiniñ medreselerinde de aman-aman bütün dersler qırımtatar tilinde berile. Kitaplar da ana tilimizde neşir etile. Eñ yaqın vaqıtta Quran-ı Kerimniñ qırımtatar tilinde tercimesi de derc etilecek. "Qardaşlıq" cemaat teşkilâtınıñ işbirliginde QMDİ binasında qırımtatar tili kursı teşkil etildi. Allah insanlarnı çeşit milletlerge, erkek ve qadınlarğa bölip, bir-birine oşamağan şekilde yarattı. Er milletniñ öz tili, medeniyeti bardır. Bunıñ içün ana tilimizni saqlamaq bizim borcumızdır. Ana tilimiz baylığımızdır. Keliñiz, elimizden kelgenini yapayıq ki, Qırımnıñ er köşesinde qırımtatar tili yanğırasın. QMDİ matbuat hızmeti.
0 yorum:
Yorum Gönder
Lütfen konuyla alakalı yorumlar yapın. Kırımın Sesi